الجحش والحمار

الجحش والحمار  لعمنا احمد فؤاد نجم

الجحش قال للحمار *** يابا اديني الحنطور

يابا إنت سنّك كبر *** و وَجَب عليّا الدور..
.
كَـحّ الحمار كَـحة *** فزعِت لها الركاب

مش يابني بالصحة *** ده كل شئ بحساب

و سواقة الحنطور *** محتاجة حدّ حكيم

و إنت عينيك فارغة *** همّك على البرسيم

قوللي تسوق إزاي *** و التبن مالي عينيك

ده حتى حبل اللجام *** واسع يا إبني عليك

إعقل و بطّل طمع *** لا تسخّن الركاب

ماتجيش يا واد جنبهم *** لا تبقى ليلة هباب

دول صنف ناس جبّار *** قادر مالوهش أمان

يبان عليهم وَهَن *** لكنهم فرسان

يابا دا نومهم تِقِل *** و بقالُه يابا سنين

كل البشر صحصحوا *** و لسه دول نايمين

يا جحش بطّل هبل *** و بلاش تعيش مغرور

رُكابنا مش أغبيا *** ولا عضمهم مكسور

بُكرة حيصحولك *** و يزلزلوا الحنطور

و تلاقي واقف فى زورك *** تمانين خازوق محشور

عمنا احمد فؤاد نجم